Military Myanmar

 မြန်မာ့လေတပ်၏ သယ်ယူပို့ဆောင်ရေး လေယာဉ်များတွင် အဓိက သုံးနေတာကတော့Y – 8 သည် တရုတ်နိုင်ငံထုတ် ဖြစ်ပြီး ATR – 72 များသည် ပြင်သစ်လေယာဉ်များ ဖြစ်သည်။

ကိုဗစ်ကာလတွင် ရခိုင်ပြည်နယ်သို့ ထောက်ပံ့ရေး ပစ္စည်းများ ပို့ဆောင်ခြင်း၊ ရွေးကောက်ပွဲအတွက် လိုအပ်သည့် မဲပုံး၊ မဲလိတ်များကိုလည်း ယခု လေယာဉ်များနှင့် ပို့ဆောင်ပေးခဲ့ခြင်းဟု သိရသည်။

မြန်မာ့လေတပ်ကို ၁၉၄၇ ခုနှစ်၊ ဒီဇင်ဘာလက ကိုလိုနီခေတ် အင်္ဂလိပ်လက်အောက်မှာ အပျော်တမ်း တပ်တခု အဖြစ် စတင်ခဲ့တာ ဖြစ်ပြီး ၁၉၅၀ ခုနှစ်တွင် စဖိုင်းယား လေယာဉ်များ မြန်မာက စတင် ဝယ်ယူနိုင်ခဲ့သည်။

တပ်မတော်၏ ပထမဆုံး ရဟတ်ယာဉ်ကို ၁၉၅၅ ခုနှစ်တွင် အမေရိကန်လုပ် Bell – 47 G အမျိုးအစား ဖြစ်ပြီး ပထမဆုံး လေကြောင်း တိုက်ပွဲမှာ ၁၉၆၂ ခုနှစ် ဖေဖော်ဝါရီလ ၁၄ ရက်နေ့တွင် မြန်မာ့ လေပိုင်နက်ထဲတွင် တရုတ်ဖြူ ကျူးကျော် လေယာဉ်များနှင့် တိုက်ပွဲ ဖြစ်ကြောင်း သိရသည်။

တရုတ်ဖြူများကို လာရောက် ထောက်ပံ့ပေးသည့် B – 24 ဗုံးကျဲလေယာဉ်များနှင့် မြန်မာ လေတပ်တို့ကြား တိုက်ပွဲ ဖြစ်ပွား ခဲ့ခြင်း ဖြစ်ပြီး ယင်းတိုက်ပွဲများအတွင်း ဗိုလ်ပီတာဆိုသူ အသက်ပေးခဲ့ရသည်။

ယင်းအချိန်အထိ တပ်မတော်တွင် ပန်ကာတပ် လေယဉ်များသာ ရှိခဲ့ပြီး ၁၉၆၂ ခုနှစ်၊ တော်လှန်ရေး ကောင်စီ အစိုးရ လက် ထက် ရောက်သည့်အခါ အမေရိကန်လုပ် အမောင်းသင် ဂျက်တိုက်လေယာဉ်များ ဝယ်နိုင်ခဲ့သဖြင့် ယင်းကာလတွင် မြန်မာ လေတပ်တွင် အရှေ့တောင်အာရှတွင် အင်အား အတောင့်တင်းဆုံး ဖြစ်ခဲ့သည်။

ယင်းနောက်ပိုင်းတွင် လေယာဉ်သစ်များလည်း ထပ်မဝယ်နိုင်တော့သလို B – 23 ဂျက်တိုက်လေယာဉ်များမှာလည်း သက်တမ်းပြည့်သွားခဲ့ကြောင်း၊ P – 7 တို့ P – 9 စသည့် ပန်ကာတပ် တိုက်လေယာဉ်များသာ ထပ်ဝယ်နိုင်ခဲ့ပြီး တိုက် လေယာဉ်များပေါ်တွင် ဗုံးသီးများ၊ ဒုံးများ ရအောင် ချိတ်၍ ပစ်ရကြောင်း သိရသည်။

၁၉၉၀ ခုနှစ်သို့ ရောက်လာသည့်အခါ တရုတ်နိုင်ငံမှ F – 7 နှင့် G – 4 ဂျက်လေယာဉ်များ ဝယ်ယူနိုင်ခဲ့ပြီး ယခုအခါ လေတပ်တွင် MiG – 29 ၊ F – 130 စသည့် စတုတ္တမျိုးဆက် ဘက်စုံသုံး တိုက်ခိုက်ရေး လေယာဉ်များ ရှိလာကြောင်း သိရသည်။

“အခုချိန်မှာ မဟာဗျူဟာမြောက် စွမ်းရည်အချို့ကို ပိုင်ဆိုင်ပြီးတော့မှ နည်းဗျူဟာမြောက် လေတပ် အဖြစ် ရပ်တည်လျက် ရှိတယ်။ အဆင့်မီတဲ့ လေတပ်တခု ဖြစ်နေပြီ။ လေတပ်တခု ရှိဖို့ဆိုတာ တိုက်လေယာဉ်တွေ ဝယ်ထားရုံနဲ့ ခေတ်မီတဲ့ လေတပ်တခု မဖြစ်ပါဘူး”ဟု တပ်မတော်မှ ဗိုလ်ချုပ် ဇော်မင်းထွန်းက ပြောသည်။

Irrawaddy Myanmar

အဓိပတိကမ္မ