(Unicode)
ကျွန်တော်တို့တွေ ပုံမှန်အားဖြင့်တော့ ခရီးသွားမယ်ဆို အနည်းဆုံး အဖော်တစ်ယောက်တော့ ပါတက်တာပေါ့လေ။ ဒါပေမယ့် အကြောင်းကြောင်းကြောင့် ပဲဖြစ်ဖြစ်၊ကိုယ်တိုင်လည်း တစ်ခါတစ်လေ တစ်ယောက်တည်း solo ပဲ ဖြစ်ဖြစ် ခရီးသွားမယ်ဆို ကြိုသိသင့်တာလေးတွေ ရှိတယ်ဗျ။ အဲဒါကတော့
- ကိုယ့်မသိစိတ်ကို အားကိုးပါ။ ဘားမှာ၊စားသောက်ဆိုင်မှာ၊နောက်ဆုံး ကိုယ်တည်းနေတဲ့ နေရာမှာကိုယ့်အတွက်မလုံခြုံသလိုခံစားရတယ်၊စိတ်မလုံသလိုဖြစ်လာတယ်၊မူမမှန်တော့ဘူးလို့ ခံစားလာရတယ်ဆို ရှောင်ထွက်သွားတာ အကောင်းဆုံးပါ။
- သူစိမ်းတွေရဲ့ ဖော်ရွေမှုကို အမြဲသတိထားပါ။ တစ်ကိုယ်တည်း ခရီးသွားတဲ့အခါ ပထမဆုံးအချက်က ကိုယ့်ရဲ့ လုံခြုံရေးပါ။ ဆိုတော့ လူတိုင်းမဟုတ်ပေမယ့် သူစိမ်းတွေရဲ့လိုတာထက်ပိုတဲ့ ဖော်ရွှေမှုမျိုး၊အစားအသောက်တွေ လာကျွေးတာမျိုးဆို မသိမသာ သတိထားသင့်ပါတယ်။
- လူများတဲ့ နေရာမှာ သွားလာပါ။ တစ်ကိုယ်တည်းခရီးသွားတဲ့အခါ လူပျက်တဲ့နေရာတွေကို တက်နိုင်သမျှရှောင်ကြဉ်ပြီး လူသူထူထပ်တဲ့ နေရာကို အကာအကွယ်ယူပြီး ခရီးသွားပါ။
- မိမိတည်းခိုတဲ့နေရာကို သူစိမ်းများ မလိုအပ်ပဲ မသိပါစေနှင့်။ ကိုယ်တည်းတဲ့ နေရာဟာ ကိုယ့်အတွက် အရေးကြီးတဲ့ အချက်ဖြစ်တာမို့ တခြားသူစိမ်းတွေကို မလိုအပ်ပဲ အသိမပေးတာ အကောင်းဆုံးပဲဖြစ်ပါတယ်။
- အလွန်အကျွံ အရက်မသောက်သင့်ပါ။ Solo ခရီးသွားမယ်ဆို နိုးနိုးကြားကြားနဲ့ သတိရှိတာက အကောင်းဆုံးဖြစ်တာမို့ ကြုံကြိုက်လို့အရက်သေစာ သောက်သုံးတဲ့အခါ သင့်ရုံသာ သောက်သုံးပါ။
- တန်ဖိုးရှိပစ္စည်းတွေကို သိုသိုဝှက်ဝှက်ထားပါ။ အပြင်ထွက်လည်တဲ့အခါ တန်ဖိုးရှိပစ္စည်းနဲ့အရေးကြီး တဲ့ စာရွက်စာတမ်း ပတ်စ်ပို့တွေကို တည်းခိုတဲ့ နေရာမှာ လုံလုံခြုံခြုံထားခဲ့တာ အကောင်းဆုံးပါ။ ဒ့ါအပြင် တစ်နေ့စာ လုံလုံလောက်လောက်သုံးရုံ ပမာဏကိုသာ ငွေကိုယူသွားသင့်ပါတယ်။
- မိမိပစ္စည်းကို ကိုယ်နဲ့ နီးနီးကပ်ကပ်ထားပါ။ ပိုက်ဆံအိတ်၊ ကင်မရာ၊ ဖုန်း စတာတွေကို ကျောပိုးအိတ်ထဲ ထည့်လွယ်သွားတာထက် ကင်မရာကို လည်မှာ ချိတ်ဆွဲမယ်၊ပိုက်ဆံအိတ်နဲ့ ဖုန်းကို ဘောင်းဘီအိတ်ထဲ လုံလုံခြုံခြုံထည့်ပြီး အပြင်ထွက်လည်သင့်ပါတယ်။
- တည်းခိုရာ ဟိုတယ် ရဲ့လိပ်စာကဒ်ကို အမြဲယူသွားပါ။ တစ်ကိုယ်တည်း ခရီးသွားတဲ့အခါ အချိန်တန်ရင် တည်းခိုတဲ့ နေရာကို ပြန်ရောက်ဖို့ သိပ်ကို အရေးကြီးပါတယ်။ ဒါမို့ ဒေသခံတွေဆီက လိုအပ်တဲ့အကူအညီတောင်းနိုင်ဖို့ ကိုယ့်ရဲ့ဟိုတယ်လိပ်စာကဒ်ကို အမြဲသွားပါ။
- ပို့ဆောင်ရေး စနစ်ကို နားလည်ပါ။ ကိုယ်သွားလည်တဲ့ ဒေသမှာ ဘယ်လိုမျိုး ပို့ဆောင်ရေး စနစ်တွေ ရှိလဲ ဆိုတာ သိထားဖို့ လိုအပ်ပါတယ်။ ကားဖြစ်စေ၊ဘက်စ်ကားဖြစ်စေ၊ ဆိုင်ကယ်ဖြစ်စေ ဒါတွေအကြောင်းသိထားဖို့လိုအပ်ပါတယ်။ ဥပမာ – ဘယ်ဟာက ဘေးကင်းတယ်၊ ကုန်ကျစရိတ်ဘယ်လောက်ရှိတယ်၊ ဘယ်အချိန်တွေအထိ ရှိတယ်၊ ကိုယ်သွားမယ့် နေရာကို ရောက်မရောက် စတာတွေ သိထားရင် ပိုကောင်းပါတယ်။ နောက်ပြီး ကိုယ်သွားလည်မယ့် ဒေသရဲ့မြေပုံပါ ကိုယ်နဲ့မကွာဆောင်ထားရင် အကောင်းဆုံးပါပဲ။
ကဲ ဒါကတော့ တစ်ယောက်တည်း ခရီးသွားဖို့စီစဉ်နေတယ်ဆို ကြိုသိထားသင့်တာလေးတွေပါ။
No comments:
Post a Comment