တစ်ကိုယ်တည်းခရီးသွားခြင်း၏အကျိုးကျေးဇူး

May 2, 2018 - by Dr.KKMM



နေ့စဉ် သွားလာ လှုပ်ရှားမှုတွေမှာ လူတွေအချင်းချင်း ဆက်ဆံကြရပါတယ်။ ကျောင်းမှာပဲဖြစ်ဖြစ်၊ ရုံးပဲသွားသွား သူငယ်ချင်း၊ မိတ်ဆွေအပေါင်းအဖော်တွေကို အဖော်ပြုပြီး နေကြရပါတယ်။ လူတွေနဲ့ ဆက်ဆံရေးကြောင့် စိတ်ညစ်စရာတွေ၊ စိတ်ဖိစီးမှုတွေကို ဖြေဖျောက်ဖို့ တစ်ယောက်တည်း အချိန်ဆိုတာ လိုအပ်လာပါတယ်။ ဒါကြောင့် စိတ်လွတ်လက်လွတ်လည်း အပန်းဖြေနိုင်အောင်၊ ကိုယ့်ကိုယ်ကိုလည်း အပြည့်အဝ အချိန်ပေးနိုင်အောင်၊ ကိုယ့်ခြေထောက်ပေါ်လည်း ကိုယ်ရပ်တည်နိုင်အောင် အဖော်မပါဘဲ တစ်ယောက်တည်း ခရီးထွက်ကြည့်လိုက်ပါ။

.

.

.

တစ်ကိုယ်တည်းခရီးသွားခြင်း၏အကျိုးကျေးဇူးများ

၁။ မိမိကိုယ်ကိုရှာဖွေပါ

မသိတဲ့နေရာတစ်ခုဖြစ်ဖြစ်၊ ရောက်ဖူးတဲ့နေရာပဲ ဖြစ်ဖြစ် တစ်ကိုယ်တည်း ခရီးထွက်ရင် ပထမဦးဆုံး ကြုံရတာက ကိုယ့်အားကိုယ် ကိုးတာပါပဲ။ စိတ်ထဲရှိတာ၊ လုပ်ချင်တာတွေ လုပ်ပြီး စိတ်ရောကိုယ်ပါ ကျေနပ်မှု ရနေပါလိမ့်မယ်။ ဘယ်အရာကို လုပ်နိုင်တယ်၊ ဘယ်အရာကို လုပ်ဖို့ ကြောက်နေတယ်ဆိုတာတွေ သိလာပြီး ကြောက်တဲ့အရာတွေကို တစ်ယောက်တည်း ရင်ဆိုင်ကျော်လွှားနိုင်ပါလိမ့်မယ်။

၂။ သူငယ်ချင်း၊ မိတ်ဆွေအသစ်ဖွဲ့ပါ

ရင်းနှီးပြီးသား သူငယ်ချင်းတွေ၊ အဖော်တွေနဲ့ ခရီးထွက်ရင် တခြားဘယ်သူနဲ့မှ စကားမပြောဖြစ်တော့ဘဲ ကိုယ့်အဖွဲ့နဲ့ကိုယ် သီးသန့်နေဖြစ်ပါလိမ့်မယ်။ တခြားသူနဲ့ စကားပြောရင်တောင် အပေါ်ယံ မိတ်ဆက်စကားလောက်ပဲ ပြောဖြစ်မှာပါ။ တစ်ယောက်တည်း ခရီးသွားတဲ့အချိန်မှာတော့ တခြားခရီးအတူ သွားဖော်သွားဖက်တွေကို ရင်းနှီးအောင်မိတ်ဖွဲ့တာ၊ ဒေသခံတွေနဲ့ စကားပြောတာတွေက သူ့အလိုလို ဖြစ်သွားပါလိမ့်မယ်။ ဒါကြောင့် တစ်ယောက်တည်း ခရီးသွားရင် လူတွေကို ရှက်ရွံတာတွေ မရှှိတော့သလို သူစိမ်းတွေနဲ့ ဘယ်လို ပေါင်းသင်းဆက်ဆံရမလဲဆိုတာပါ သိသွားပြီး မိတ်ဆွေ၊ သူငယ်ချင်းအသစ်တွေ ရလာမှာပါ။

၃။ အတွေ့အကြုံအသစ်တွေ ရရှိနိုင်ပါတယ်

တစ်ယောက်တည်းခရီးသွားရင် တခြားခရီးသွားဖော်တွေ၊ ဒေသခံတွေက ပိုဖေးမကူညီကြပါတယ်။ ဒါကြောင့် အတွေ့အကြုံအသစ်တွေ ပိုရနိုင်ပါတယ်။ ဒေသခံတွေ၊ မိတ်ဆွေတွေက သူတို့အိမ်တွေကို ဖိတ်မယ်၊ စကားပြောပြီး ရင်းရင်းနှီးနှီး ပိုနေဖြစ်ပါမယ်။ အဲဒီကနေ ဒသခံတွေရဲ့ အပြုအမူတွေ၊ စကားပြောသံဟန်ပန်တွေကို ပိုနီးနီးကပ်ကပ် သိခွင့်ရပြီး ဒေသထွက်အစားအစာတွေ၊ နာမည်ကြီးတဲ့နေရာတွေ၊ သမိုင်းကြောင်းတွေထိပါ လေ့လာလို့ရပါတယ်။

၄။ ပိုပြီး လွတ်လပ်ပေါ့ပါးနေပါလိမ့်မယ်

တစ်ယောက်တည်း ခရီးသွားရင် ကြိုက်တဲ့နေရာကို ကြိုက်သလို သွားလို့ရပါမယ်။ နားချင်ရင်နား၊ စားချင်ရင်စား၊ စိတ်တိုင်းကျနေထိုင်ပြီး အပန်းဖြေလို့ ရပါလိမ့်မယ်။ ခရီးအစီအစဉ်ကိုလည်း စိတ်တိုင်းကျပြောင်းပြီး စိတ်ကြိုက်လုပ်လို့ရမှာပါ။ အဖွဲ့လိုက်ရဲ့ ခရီးအစီအစဉ်တွေအတိုင်း လိုက်လုပ်စရာ မလိုပါဘူး။ ဒါကြောင့် ခရီးသွားဖော် မကောင်းတာထက်စာရင် တစ်ယောက်တည်း ခရီးသွားတာက အများကြီး ပိုလွတ်လပ်ပျော်ရွှင်ရပါတယ်။

၅။ အထီးကျန်သလို ခံစားရမှာ မဟုတ်တော့ပါဘူး

တစ်ယောက်တည်း ခရီးသွားပေမယ့် အထီးကျန်တယ်လို့ ခံစားရမှှာ မဟုတ်တော့ပါဘူး။ တည်းခိုခန်း၊ ဟိုတယ်ကို ဝင်သွားလိုက်တာနဲ့ ကိုယ့်လို တစ်ယောက်တည်း ခရီးသွားတဲ့သူတွေကို မြင်လိုက်ရင် စိတ်က ရင်းနှီးပြီး အလိုလိုနေရင်း ပျော်သွားမှာပါ။ အိမ်ကိုတော့ စစချင်းမှာ လွမ်းနေနိုင်ပေမယ့် သူငယ်ချင်းမိတ်ဆွေ အပေါင်းအသင်းအသစ်တွေနဲ့ စကားတွေပြောရင်း ရင်းနှီးသွားသလို အတွေ့အကြုံအသစ်တွေလည်း ရလာမှာပါ။

၆။ ကြောက်ရွံနေတဲ့အရာတွေကို ရင်ဆိုင်ကျော်လွှားနိုင်မှာပါ

တစ်ယောက်တည်း ရှိနေချိန်မှာ ကိုယ့်ကိုယ်ကို အားကိုးပြီး နေရလို့ စိတ်ဓာတ်ပိုခိုင်မာလာမှာပါ။ ခါတိုင်း မလုပ်ရဲဘူးလို့ ထင်တဲ့အရာတွေကိုတောင် ခုမဖြစ်မနေ လုပ်ရင်းနဲ့လုပ်ရဲသွားမှာပါ။ ဒါကြောင့် ခရီးများများ ထွက်လေ၊ ကြောက်စိတ်တွေ နည်းပြီး ကိုယ့်ကိုယ်ကို ယုံကြည်မှု ပိုရှိလေဖြစ်မှာပါ။

၇။ နေရာအစုံမှာ စားတတ်လာမှာပါ

ခရီးသွားတာရဲ့ရင်ခုန်စရာအကောင်းဆုံးတစ်ခုက အစားအသောက်ဆိုရင် မှားမယ် မထင်ပါဘူး။ လမ်းဘေးအစာပဲဖြစ်ဖြစ်၊ စားသောက်ဆိုင်ကြီးအစာပဲဖြစ်ဖြစ် ဘာမှမရွေးဘဲ စားတတ်လာမှာပါ။ တစ်ယောက်တည်း ခရီးသွားရင် ကိုယ်ကြိုက်တဲ့နေရာမှာကြိုက်သလို စားလို့ရပါတယ်။ ကိုယ့်စိတ်ကြိုက်အစားအသောက်ချည်းပဲ တစ်နေကုန် ပတ်စားလည်းရပါတယ်။

၈။ ပိုက်ဆံပိုချွေတာဖြစ်တယ်

တစ်ယောက်တည်း ခရီးသွားတာက အဖွဲ့လိုက် ခရီးသွားတာထက်စာရင် ပိုက်ဆံပိုချွေတာ ဖြစ်ပါတယ်။ ကိုယ်ရောက်ရာ နေရာမှာ ဘယ်နေရာက အစားအစာပဲဖြစ်ဖြစ် စားပြီး တစ်ယောက်တည်း နေရာအစုံကို သွားလည်နေရတာနဲ့ လက်ဆောင်ပစ္စည်းဆိုတာလည်း ဝယ်ဖို့ အချိန်ရှိမှာမဟုတ်တော့သလို စားဖို့နေရာ၊ နေဖို့နေရာလည်း သိပ်ရွေးတော့မှာမဟုတ်ပါဘူး။

၉။ မိမိကိုယ်ကို ယုံကြည်မှု ပိုရစေပါတယ်

တစ်ယောက်တည်း ခရီးသွားနေချိန်မှာ အခက်အခဲ အမျိုးမျိုး၊ လူအကျင့်စရိုက်အမျိုးမျိုးနဲ့ ကြုံရတတ်ပါတယ်။ အဲဒါတွေ အကုန်လုံးကို စိတ်အားတင်းပြီး ရင်ဆိုင်ဖြေရှင်းရင်း မိမိကိုယ်ကို ယုံကြည်မှု ပိုရလာစေပါတယ်။

၁၀။ စိတ်ရှုပ်စရာတွေ ရှိလာမှာ မဟုတ်တော့ပါဘူး

လူအမျိုးမျိုး စိတ်အထွေထွေပါ။ တစ်ယောက်နဲ့ တစ်ယောက် စိတ်တူကိုယ်တူဖြစ်ဖို့က ရှားပါတယ်။ ကိုယ်နဲ့ခရီးအတူတူသွားနေတဲ့ သူငယ်ချင်းရဲ့ စိတ်အလိုကျကို လိုက်လုပ်ပေးစရာ မလိုတော့သလို၊ သဘောထား မတိုက်ဆိုင်လို့ စကားအချေအတင် ပြောရပြီး စိတ်ညစ်စရာလည်း မလိုတော့ပါဘူး။ ကံမကောင်းရင် ခရီးစဉ်ပျက်သွားတဲ့အထိ ရန်ဖြစ်စရာလည်း မလိုတောပါဘူး။ ကိုယ့်စိတ်ကြိုက် စိတ်လွတ်ကိုယ်လွတ် ခရီးထွက်လို့ရပါပြီ။

ဒါကြောင့် တစ်ယောက်တည်း ခရီးထွက်ဖို့ကြောက်မနေဘဲ အတွေ့အကြုံသစ်တွေ ရှာဖို့အခုပဲ ပြင်ဆင်လိုက်ကြပါစို့လားနော်။

စာရေးသူ – ဒေါက်တာအိမ့်

Ref – https://etramping.com