မြို့တော်ဝန်နှင့် ရပ်ကွက်အုပ်ချုပ်ရေးမှူးများအပြင် ရွေးကောက်တင်မြှောက်ရသော မြို့တော်အစိုးရအဖွဲ့ဝင်များရှိသေး၏။ မြို့တော် မှတ်တမ်းထိမ်းသိမ်းသူ (City Assessor-Recorder)၊ မြို့တော်အစိုးရရှေ့နေ(City Attorney)၊ ရပ်ကွက်ဒေသရှေ့နေ (District Attorney)၊ ပြည်သူ့ကာကွယ်ရေးရှေ့နေ (Public Defender)၊ ကောင်တီရဲချုပ် (Sheriff)၊ မြို့တော် ဘဏ္ဍာရေးမှူးနှင့် အခွန်ဝန် ( City Treasurer and Tax Collector) တို့ကိုပါ မြို့နေလူထုက ရွေးချယ်ပေးရသည်။ မြို့တော်အုပ်ချုပ်ရေးဥပဒေ ( City Charter) အရ ဆောင်ရွက်ကြရသည်။
ချာတာ (Charter)ဥပဒေနှင့်အုပ်ချုပ်သော ကောင်တီ (County) များမှာ ကယ်လီဖိုးနီးယားပြည်နယ်တွင် (၁၃)ကောင်တီသာရှိသည်။ ကောင်တီဆိုသည်မှာ မြန်မာပြည်မှ မြို့နယ်အဆင့်ကို ဆိုလိုသည်။ ဆန်ဖရန်စစ္စကိုကောင်တီတွင် ဆန်ဖရန်တစ်မြို့ထဲသာရှိသဖြင့် Government of the City and County of San Francisco ဟု မြို့အစိုးရကို ခေါ်ဝေါ်သည်။ အခြားသော အစိုးရဌာနများနှင့် အေဂျင်စီများစွာရှိသည်။ အများစုသောခေါင်းဆောင်များကို မြို့တော်ဝန်က တိုက်ရိုက်ခန့်ထားသည်။
ဆန်ဖရန်စစ္စကိုမြို့အတွက် ၂၀၁၉-၂၀၂၀ ရသုံးငွေစာရင်းကို ဒေါ်လာ(၁၁)ဘီလီယံ သတ်မှတ်ထားသည်။ အမရေိကန်ပြည်ထောင်စုရှိ မြို့ကြီးများအနက် အသုံးစားရိတ်အများဆုံးမြို့လည်းဖြစ်သည်။ ဤ ရသုံးငွေစာရင်းသည် မြန်မာပြည်တစ်ခုလုံး၏ နှစ်စဉ်ဘဏ္ဍာရေးရသုံးငွေစာရင်းနီးပါးရှိ၏။ အစိုးရ၏ ဝင်ငွေများအနက် အိမ်ခြံမြေခွန်သည် ငါးပုံတစ်ပုံရှိသည်။ တစ်နှစ်လျှင် ဒေါ်လာ(၂)ဘီလီယံကျော် ဖြစ်၏။
ရောင်းဝယ်ခွန် အဖြစ် ဆယ်ရာခိုင်နှုန်းနီးပါး(၉.၇၅%) ကောက်ခံသည်။ ဝင်ငွေ (၃၀%) အထိသည် ရောင်းဝယ်ခွန်မှ ရရှိသည်။ ကျန်သောငါးဆယ်ရာခိုင်နှုန်းသာ အခြားဝင်ငွေများဖြစ်၏။
မြို့တော်အစိုးရသည် မြို့၏ အကြီးမားဆုံးအလုပ်ရှင်လည်းဖြစ်၏။ မြို့တော်၏ အမြဲတန်းနှင့် ယာယီအစိုးရဝန်ထမ်းစုစုပေါင်း နှစ်သောင်းခုနှစ်ထောင်အထိ ရှိသည်။ ပြည်သူ့ဝန်ထမ်းဌာန (Department of Public Work) သည် မြန်မာပြည်တွင် စည်ပင်သာယာနှင့်ညီမျှသည်။ မြူနီစပယ် ပို့ဆောင်ရေး အေဂျင်စီ (Municipal Transportation Agency) မြို့တွင်း ခရီးသည်ပို့ဆောင်ရေးလုပ်ငန်းလုပ်ကိုင်သည်။ ပြည်သူ့အခြေခံလိုအပ်ချက်များ ကော်မရှင် (Public Utility Commission) သည် ရေ၊မီး၊ ဓါတ်ငွေ့ စသည့်လိုအပ်ချက်များကို ကိုင်တွယ်ရသည်။ ရဲဌာန၊ မီးသတ်ဌာန၊ အကျဉ်းဦးစီးဌာနစသည်ဖြင့် အခြားသောဌာနပေါင်း ရာချီရှိသည်။
ဆန်ဖရန်စစ္စကို၏ ရာဇဝတ်မှုသည် အခြားမြို့ကြီးများနှင့်ယှဉ်လျှင် နည်းပါးသည်။ ရဲဌာနတွင် ရဲအရာရှိပေါင်း နှစ်ထောင့်တစ်ရာကျော်ရှိ၍ ရဲစခန်းဆယ်ခုဖွင့်လှစ်ထားသည်။ ဆန်ဖရန် ရဲဌာနသမိုင်းတွင် ပထမဆုံး အာရှနွယ်ဖွားအမျိုးသမီးရဲချုပ်သည်လည်း တာဝန်ထမ်းဆောင်ခဲ့ဖူးသည်။ထိုနည်းတူစွာပင် ဆန်ဖရနစစ္စကိုမြို့၏ မီးသတ်ဦးစီးချုပ်သည်လည်း အမျိုးသမီးဖြစ်သည်။ မြို့တော်ဝန်သည်လည်း အမျိုးသမီးဖြစ်သည်။ မြို့အုပ်ချုပ်ရေးမှူးများတွင်လည်း အမျိုးသမီးများစွာပါဝင်သည်။ ဆန်ဖရန်စစ္စကိုမြို့သည် အမျိုးသမီးများ၏ဂဏ္ဍကို များစွာအားပေးသည့်မြို့တစ်မြို့ဖြစ်၏။ ထို့ကြောင့်လည်း မြို့၏ခေါင်းဆောင်ပိုင်းတွင် အမျိုးသမီးထုအားကောင်းနေခြင်းဖြစ်သည်။ ကျားမခွဲခြားမှုအနည်းဆုံးမြို့ဟု ဆိုသည်။
မြို့၏အထွေထွေကုန်ကျစားရိတ်ကြီးမြင့်သလို လုပ်ခလစာလည်း မြင့်သည်။ အမေရိကန်ပြည်ထောင်စု၏ အနိမ့်ဆုံးလစာသည် (၇.၂၅) ဒေါ်လာသာ သတ်မှတ်ထားသော်လည်း ဆန်ဖရန်စစ္စကိုမြို့အစိုးရက တစ်နာရီလျှင် (၁၅)ဒေါ်လာ သတ်မှတ်ထားသည်။
မြို့တည်နေရာအရ အနောက်ဖက်တွင် ပစိဖိတ်သမုဒ္ဒရာ၊ မြောက်ဖက်နှင့် အရှေ့ဖက်တွင် ပင်လယ်ကွေ့တို့ဝိုင်းရံထားပြီး တောင်ဖက်သည်သာ ကုန်းပိုင်းဖြစ်သည်။ တောင်တန်းများစွာတည်ရှိသဖြင့်တည်နေရာအလွန်ထူးခြားလှပသည်။ ရေနှင့်ကုန်းမြေတို့သဘာဝ၏ ဆက်စပ်အလှတရားများ၊ လူလုပ်ကျွန်း၊ ပန်းခြံကြီးများ၊ ရှေးဟောင်းအဆောက်အဦများစသည်ဖြင့် ကြည့်ရှုလည်ပတ်စရာ များစွာရှိသည့် မြို့တစ်မြို့လည်း ဖြစ်သည်။
ဆန်ဖရန်စစ္စကို လာလည်မည်ဆိုလျှင် မရောက်မဖြစ်သွားလည်ရမည့်နေရာများ မနည်းလှ။ မြို့တွင်းအပြင် မြို့ပြင်ဖက်တွင်ပါ သွားရောက်သင့်သည့်နေရာများစွာရှိသည်။ ထိုနေရာများထဲမှ ကောင်းနိုးရာရာနေရာများကို မိတ်ဆက်ပေးချင်ပါသည်။
(၁)ဂိုးလ်ဒင်းဂိတ်တံတား (Golden Gate Bridge)
Golden Gate တံတားသည် ဆန်ဖရန်၏ သင်္ကေတဖြစ်သည်။ ဆန်ဖရန်မြောက်ဖက်ပိုင်းရှိ မြို့များနှင့်ဆက်သွယ်ရန်အတွက် လေတိုက်နှုန်းအလွန်ပြင်းသော ပင်လယ်ကွေ့အဝကို ဖြတ်သန်းထားသည့် ကြိုးတံတားဖြစ်သည်။ သဘောၤများဝင်ထွက်ရာအပေါက်ဝဖြစ်၍ ကြိုးတံတားဒီဇိုင်းကို ရွေးချယ်ခဲ့သည်။ ခေတ်သစ်ကမ္ဘာ၏ ထူးခြားအံ့မခန်းသောတည်ဆောက်မှုအဖြစ် ယနေ့တိုင် တည်ရှိနေဆဲဖြစ်၏။ ထိုခေတ်အခါက မဖြစ်နိုင်ဟုဆိုသောအရာကို ဖြစ်အောင်လုပ်ပြခဲ့ကြသည့် အင်ဂျင်နီယာများကို လေးစားပါသည်။ ယခုခေတ်တွင် အလွန်တရာရှည်လျှားသော ကြိုးတံတားများ တည်ဆောက်နိုင်ခြင်းမှာလည်း ဤတံတား၏ ဆောက်လုပ်ရေးလုပ်ငန်းမှ လေ့လာသင်ယူခဲ့မှုများကြောင့် ဖြစ်၏။
တံတားအရှည်စုစုပေါင်း (၁.၇)မိုင်ရှည်ပြီး အကျယ်ပေကိုးဆယ်၊ အမြင့် (၇၄၆)ပေရှိသော ဤကြိုးတံတားကို ၁၉၃၃ခု ဇန်နဝါရီလတွင်စတင်တည်ဆောက်ခဲ့ပြီး ၁၉၃၇ခုနှစ် မေလ(၁၇)တွင်ဖွင့်လှစ်ခဲ့ရာ ယခုဆိုလျှင် နှစ်ပေါင်းရှစ်ဆယ်ကျော်ရှိခဲ့ပြီ။ ဖိုးဖိုးကြီးအရွယ်ရောက်နေပြီဖြစ်သော ထိုတံတားအိုကြီးပေါ်မှ နေ့စဉ်လိုလို ယာဉ်မျိုးစုံအစီးရေစုစုပေါင်း တစ်သိန်းတစ်သောင်းကျော် ဖြတ်သန်းလျှက်ရှိ၏။ ပြုပြင်ထိန်းသိမ်းမှုကောင်းသဖြင့် နှစ်ရာကျော်သည့်တိုင် အသုံးတော်ခံနေမည်မှမလွဲ။ ဘယ်ညာ တစ်ဖက်လျှင် တစ်ပေမျှရွေ့လျှားနိုင်သဖြင့် ငလျှင်ဒါဏ်လည်း ပူစရာမရှိ။
ဤနေရာသည် ရှုခင်းအလှဆုံးတံတားတစ်ခုမို့ ဓါတ်ပုံဆရာများအကြိုက်တွေ့ကြ၍ ဓါတ်ပုံအရိုက်ခံရဆုံးတံတားတစ်စင်းအဖြစ် တည်ရှိနေသည်။ တံတားပေါ်မရောက်မှီမှစ၍ တံတားပေါ်အထိ ဓါတ်ပုံရိုက်ရန်ရှုခင်းပေါင်းစုံက ရင်သတ်ရှုမော။ ရုပ်ရှင်ဇာတ်ကားများစွာတွင် အဓိကဇာတ်ကောင်အဖြစ်အသုံးတော်ခံခဲ့ရသလို ယနေ့တိုင်လည်း အသုံးတော်ခံနေမြဲဖြစ်သည်။
(၂) အယ်ကာထရဇ်ကျွန်း (Alcatraz Island)
ဆန်ဖရန်စစ္စကိုမြောက်ဖက် ကမ်းခြေနှင့် (၁.၂၅)မိုင်အကွာတွင်ရှိသောကျွန်းငယ်လေးသည်လည်း နာမည်ကျော်နေရာတစ်ခုဖြစ်၏။ မီးပြတိုက်ထားရှိရာကျွန်းကလေးမှသည် ၁၉၃၄မှ ၁၉၆၃ အထိ ဗဟိုအစိုးရအကျဉ်းထောင်ဖြစ်ခဲ့သောသည်ကျွန်းလေးတွင် အမေရိကန်ပြည်ထောင်စု၏ နာမည်ကျော်လူဆိုးကြီး အယ်လ်ကာပုန်း (Al Capone)အပါအဝင် ထိပ်တန်းဒုစရိုက်သမားများစွာကို ထိမ်းသိမ်းထားခဲ့ရာ နေရာဖြစ်၏။
ကမ်းခြေနှင့်တစ်မိုင်သာသာအကွာအဝေးသာဖြစ်၍ အကျဉ်းထောင်မှ ထွက်ပြေးရန်အကြိမ်ကြိမ်ကြိုးစားကြသော်လည်း မည်သူတစ်ဦးတစ်ယောက်မျှ အောင်မြင်မှုမရခဲ့ကြ။ ဖေါက်ထွင်းထွက်ပြေးခဲ့သူ အကျဉ်းသား(၃၆)ဦးတွင် (၂၃)ဦးအရှင်ဖမ်းမိ၊ (၆)ဦးကိုအသေပစ်ခတ်ဖမ်းမိ၊ (၂)ဦးရေနစ်သေဆုံးသည်။ ကျန်သူများမှာ ရေနစ်သေဆုံးဟုယူဆ၍ ပျောက်ဆုံးစာရင်းဝင်သည်။ အလွန်အေးမြသောပင်လယ်ရေနှင့် ပြင်းထန်သောလှိုင်းပုတ်မှုကို အံ့တုနိုင်စွမ်းမရှိခဲ့ကြ။
ယခုအခါ ပြတိုက်ပြုလုပ်ထားသောအကျဉ်းထောင်ဟောင်းပေါ်သို့ သဘောၤဖြင့် သွားရောက်လည်ပတ်နိုင်သလို သဘောၤဖြင့်ပင် ကျွန်းတစ်ပတ်ပတ်၊ ရွှေတံတားကြီးအောက်မှဖြတ်၍ ဆန်ဖရန်စစ္စကိုမြို့၏ ရင်သတ်ရှုမောရှုခင်းများကို အဝေးမှကြည့်ရှုခံစားနိုင်သည်။ နာမည်ကျော် ဂျိန်းစဘွန်းမင်းသားကြီး ရှောင်ကွန်နရီသရုပ်ဆောင်ခဲ့သည့် The Rock အမည်ရှိ အကျဉ်းထောင်ရုပ်ရှင်ကားသည် သည်ကျွန်းကိုအခြေပြု၍ ရိုက်ကူးခဲ့သည်။
(၃) တောင်ကုန်းညီနောင် (Twin Peaks)
အမြင့်ပေ(၉၂၅)ပေမြင့်သော တောင်ကုန်းညီနောင်သည် ဆန်ဖရန်စစ္စကိုမြို့တစ်မြို့လုံးနည်းပါးကို မြင်တွေ့ရသည့်နေရာဖြစ်၏။ တချိန်က အိုလိုနီလူရိုင်းတို့အမဲလိုက်ရာတွင် အပေါ်စီးမြင်ကွင်းအဖြစ်အသုံးပြုခဲ့ရာဖြစ်သော သည်နေရာသည် ဆန်ဖရန်စစ္စကိုမြင်ကွင်းကျယ်ကြိုက်သူများအတွက် မရောက်မဖြစ်ရောက်ရမည့်နေရာဖြစ်၏။ မနက်ပိုင်းနှင့် ညနေပိုင်းဆိုလျှင် မြူများဖုံးနေ၍ မြို့ကိုမမြင်ရတတ်သောကြောင့် နေ့ခင်းပိုင်းတွင် သွားသင့်သည်။
(၄)ဂိုးလ်ဒင်းဂိတ်ပန်းခြံ (Golden Gate Park)
အရှေ့မှအနောက်သို့ သုံးမိုင်ကျော်ရှည်လျှား၍ တောင်မှမြောက်သို့ မိုင်ဝက်ခန့်ကျယ်သော ဤပန်းခြံကြီးကို ၁၈၇၁ခုနှစ်မှစ၍ စတင်အကောင်အထည်ဖေါ်ခဲ့သည်။ မြေဧက တစ်ထောင်ကျော်အကျယ်အဝန်းရှိသည်။ နယူးယောခ်မြို့ရှိဗဟိုပန်းခြံကြီး (Central Park) ထက် နှစ်ဆယ်ရာနှုန်းကျော်ပိုမိုကျယ်ဝန်းပြီး နှစ်စဉ် လူဦးရေ (၁၃)သန်းကျော်လာရောက်လည်ပတ်ကြသည်။ အပင်ပေါင်း တစ်သိန်းခွဲခန့်စတင်စိုက်ပျိုးပြုစုခဲ့ရာမှ ယခုအခါ တောအုပ်ကြီးများ၊ ပန်းမျိုးစုံ၊ ရေကန်ကြီးငယ်များ၊ ကလေးကစားကွင်းများ၊ ငှက်တိရိစ္ဆာန်များဖြင့် သာယာလျှက်ရှိ၏။မြို့ပြ၏ မွန်းကျပ်မှုကို ရှောင်တိမ်းလိုသူတို့အတွက် အကောင်းဆုံးနေရာဖြစ်၏။ မြို့ထဲမှာ တောအုပ်ကြီးဖြစ်အောင် ဖန်တည်းထားသည်။ ပန်းခြံ၏ အနောက်ဖက်အစွန်းသည် ပစိဖိတ်သမုဒ္ဒရာအထိ ကျယ်ဝန်းသဖြင့် ပန်းခြံမှထွက်၍ ကမ်းခြေတလျှောက် လမ်းလျှောက်နိုင်သည်။ ပနိးခြံထဲတွင်အနုပညာဆိုင်ရာ၊ သိပ္ပံဆိုင်ရာ ပြတိုက်ကြီးများလည်းတည်ဆောက်ထားသည်။
ဤနေရာသည် ၁၉၀၆ခုနှစ် ဆန်ဖရန်စစ္စကိုငလျှင်ကြီးအပြီးတွင် ဒုက္ခသည်နှစ်သောင်းအား ယာယီအိမ်ရာများတည်ဆောက်ပေးခဲ့သည့် နေရာလည်းဖြစ်သည်။ တေးဂီတပွဲတော်များလည်း မကြာခဏ ကျင်းပရာနေရာဖြစ်သည်။
(၅) အနုပညာမြောက်နန်းတော်နေရာ (Palace of Fine Arts)
ရောမနှင့်ရှေးဟောင်းဂရိနန်းတော်ဟောင်းကြီးပုံစံ တည်ဆောက်ထားသည်။ ၁၉၁၅တွင်ကျင်းပခဲ့သော ပနားမား ပစိဖိတ် ကုန်စည်ပြပွဲအတွက် အဆောက်အဦပေါင်းများစွာတည်ဆောက်ခဲ့ရာမှ တစ်ခုဖြစ်၏။ ပွဲကြီးအပြီးတွင် အခြားလက်ရာများစွာကို ဖြိုချဖျက်စီးခဲ့သော်လည်း ဤနန်းတော်ဟောင်းပုံစံ အဆောက်အဦးကြီးကို မဖျက်ဆီးလိုသောသူများက စောင့်ရှောက်ပြင်ဆင်ထိန်းသိမ်းခဲ့ရာမှ ယနေ့တိုင် မြင်တွေ့နေရဆဲဖြစ်သည်။
ဓါတ်ပုံရိုက်ရန် အလွန်လှသောနေရာဖြစ်၍ မင်္ဂလာဆောင်ကြမည့်သူများ မရောက်မဖြစ် ရောက်အောင်လာ၍ ရိုက်ကြရသည်။ မရင်နာ (Marina) ခေါ် ပင်လယ်ဆိပ်ကမ်းလမ်းတစ်လျှောက် လမ်းလျှောက်ရင်း လေကောင်းလေသန့်ရှုနိုင်သည်။
(၆) တံငါဆိပ် (Fishermen’s Wharf)
၁၈၀ဝပြည့်၏ နှောင်းပိုင်းတွင်ရောက်ရှိလာသူ အီတလီနိုင်ငံသားတံငါသည်များ စတင်အခြေချရာမှ တံငါဆိပ်ဖြစ်ပေါ်လာသည်။ ထိုသူတို့သည် ဆန်ဖရန်စစ္စကို မြောက်ပိုင်းကမ်းခြေတွင်နေထိုင်ရာမှ North Beach ရပ်ကွက် ဖြစ်တည်လာသည်။ ထိုနေရာကို ဒေါ်လာ(၁၅)သန်းအကုန်အကျခံကာ ကမ္ဘာလှည့်ခရီးသွားများ စိတ်ဝင်စားလာရေးအတွက် ပြင်ဆင်ခဲ့ကြသည်။
ဆိပ်ကမ်းအမှတ်(၃၉) တည်ရှိရာဖြစ်၍ Pier 39 ဟုလည်းခေါ်သောသည်နေရာနှင့်တဆက်တည်းတွင် အမျိုးသားရေကြောင်းသမိုင်းပြတိုက်၊ ဒုတိယကမ္ဘစစ်ကအသုံးပြုခဲ့သည့် ရေငုတ်သဘောၤဟောင်း (USS Pampanito)၊ ၁၉ရာစုက အသုံးပြုခဲ့သည့် ကုန်ပစ္စည်းတင်သဘောၤ (Balclutha ) စသည်တို့ကိုပါ တွေ့မြင်နိုင်သည်။ ပင်လယ်ဖျံကြီးများ (Sea Lion)သည်လည်း ဆိပ်ကမ်းတစ်ဝိုက်တွင်နေထိုင်ကြသည်။ ပင်လယ်ပြင်မှ ပြန်လည်ဆိုက်ရောက်လာသော ငါးဖမ်းလှေများလည်း နေ့စဉ်ဆိုက်ကပ်နေဆဲဖြစ်၍ လတ်ဆတ်သော ပင်လယ်စာများ ရရှိသည်။ ပင်လယ်ဂဏန်းကြီးများသည် အလွန်အရသာထူးကဲလှသည်။ အမှတ်တရပစ္စည်းအရောင်းဆိုင်များ၊ ပြခန်းများစွာဖြင့် အလွန်စည်ကားသည်။ လွတ်လပ်ရေးနေ့တွင် မီးရှူးမီးပန်းပစ်ဖေါက်ရာနေရာဖြစ်၏။
(၇)ကေဘယ်လ်ကား (Cable Car)
ဆန်ဖရန်စစ္စကိုရောက်လျှင် ကေဘယ်လ်ကားစီးရန်လည်း မမေ့ပါနှင့်။ မော်တော်ကားကဲ့သို့ စက်မပါပဲ မီးရထားလမ်းအောက်တွင် ရွေ့လျှားနေသော ကေဘယ်လ်ကြိုးကြီးဖြင့် ချိတ်ဆက်မောင်းနှင်ခြင်းဖြစ်၏။ ထို့ကြောင့် တစ်နာရီ(၁၃)မိုင်သာသာ အလွန်နှေးသောနှုန်းဖြင့်သာ ရွေ့လျှားသည်။
မြင့်မားသောတောင်ကုန်းများကြောင့် မြင်းလှည်းများလန်ကျ၍ မကြာခဏဒုက္ခဖြစ်ရာမှ ေ၁၈၇၃တွင် ကေဘယ်လ်ကားပေါ်ပေါက်ခဲ့သည်။ ၁၈၉၀အထိ လိုင်းပေါင်း (၂၃)လိုင်းရှိခဲ့သော်လည်း နှစ်တစ်ရာကျော်ခန့်ကြာသောအခါ လိုင်းသုံးလိုင်းသာ ကျန်ရှိသည်။ နေ့စဉ်လူနှစ်သောင်းခန့်ကိုပို့ဆောင်ပေးနေသောကြောင့် နှစ်စဉ်လူခုနှစ်သန်းခန့် စီးနင်းလိုက်ပါသည်။ ကေဘယ်လ်ကားပြတိုက်သို့လည်း ဝင်ရောက်ကြည့်ရှုနိုင်သည်။ မတ်စောက်သောတောင်ကုန်းများပေါ်တွင် တည်ဆောက်ထားသဖြင့် ကားစီးရင်း သဘာဝရှုခင်းကို ခံစားနိုင်သည်။ ယူနီယံစကွဲမှ တံငါဆိပ်အထိကေဘယ်လ်ကားလမ်းသည် ခရီးသည်များအကြိုက်တွေ့ကာ အထင်ရှားဆုံးဖြစ်၏။
(၈)ယူနီယံစကွဲ (Union Square)
မြို့လည်ရှိ ပန်းခြံလေးတစ်ခုဖြစ်၏။ Shopping သမားတို့အကြိုက်ဖြစ်၍ အမျိုးသမီးထုအတွက် မရောက်မဖြစ်။ အလုပ်သမားသမဂ္ဂများကို ထောက်ခံသူတို့စုဝေးရာနေရာဖြစ်၍ Union Square ဟု ခေါ်တွင်သည်။ စီးပွားရေးရပ်ကွက် (Financial District)၊ တရုတ်တန်း (Chinatown )တို့နှင့် ကပ်လျှက်တည်ရှိသည်။ ဟော်တယ်ကြီးများ၊ ဈေးဝယ်စင်တာများ၊ ပြဇာတ်ရုံများ၊ စားသောက်ဆိုင်များ အနီးအနားတွင်ရှိသည်။ တံငါဆိပ်သွားရာ ကေဘယ်လ်ကားဂိတ် စတင်သည့်နေရာဖြစ်သည်။ ပန်းခြံအလယ်တွင် နိုက်ကီ(Nike) ဟုအမည်ရသည့် အောင်မြင်ခြင်းကိုကိုယ်စားပြုသော ဂရိနတ်ဘုရားမ၏ ရုပ်ထုကိုကျောက်တိုင်ထိပ်တွင် မြင်တွေ့နိုင်သည်။ (ကမ္ဘာကျော်ဖိနပ်တံဆိပ်သည် ထို Nike ခေါ် အောင်မြင်ခြင်းဂရိနတ်ဘုရားမ၏ အမည်ပင် ဖြစ်ပါ၏။)
(၉)တရုတ်တန်း (Chinatown)
အမေရိကန်ပြည်ထောင်စုရှိ တရုတ်တန်းများတွင် ရှေးအကျဆုံးဖြစ်သည်။ မိုင်ဝက်ပတ်လည်အလျှားအနံရှိ စတုရန်းပုံသဏ္ဍန်ရှိ ဆန်ဖရန်စစ္စကိုတရုတ်တန်းသည် မြောက်အမေရိကတိုက်တွင် အကြီးမားဆုံးလည်း ဖြစ်သည်။ ဤနေရာကျဉ်းလေးတွင် နေထိုင်ကြသူ လေးသောင်းနီးပါးရှိသဖြင့် နယူးယော့ခ်မြို့၏ မဟက်တန်ရပ်ကွက်မှလွဲလျှင် အမေရိကန်ပြည်ထောင်စု၌ လူနေသိပ်သည်းမှုအများဆုံးဖြစ်၏။ မိသားစုများ စုစုပေါင်း၏ သုံးပုံနှစ်ပုံသည် ဟော်တယ်ခန်းအရွယ်အခန်းငယ်များတွင် နေထိုင်ကြသည်။ တစ်နှစ်ဝင်ငွေ နှစ်သောင်းခန့်သာရှိသဖြင့် ဝင်ငွေအလွန်နည်းပါးကြသည်။ နေထိုင်သူစုစုပေါင်း၏ ရာနှုန်းပြည့်နီးပါးမှာလည်း တရုတ်လူမျိုးများ သို့မဟုတ် အာရှတိုက်သားများပင် ဖြစ်ကြသည်။ ချမ်းသာသူတရုတ်အများစုကမူ Sunset၊ Richmond စသည့် ပင်လယ်နှင့်နီးသောရပ်ကွက်များတွင် နေထိုင်ကြသည်။ တရုတ်တန်း၏ သမိုင်းကြောင်းမှာ ရှည်လျှားလှသည်။
ဂရန့်လမ်း( Grant Avenue) ပေါ်ရှိ တရုတ်တန်း၏အဝင်ပေါက်တစ်ခုပေါ်ရှိ နဂါးဂိတ် (Dragon Gate) သည် အလှဓါတ်ပုံရိုက်သူတို့အတွက် မျက်စိကျစရာနေရာဖြစ်သည်။ နှစ်တစ်ရာကျော်ပြီဖြစ်သည့် တရုတ်ရှေးဟောင်းလက်ရာ လမ်းမီးတိုင်ကြီးများကိုလည်း တွေ့နိုင်သည်။ တရုတ်ရိုးရာအစားအစာများကိုလည်း ဈေးနုှန်းသက်သာစွာ စားသုံးနိုင်သည်။ အမှတ်တရပစ္စည်းဆိုင်များ၊ ရှေးဟောင်းတရုတ်ဘုရားကျောင်းများ ရှိသည်။
ကမ္ဘာကျော် ကွန်ဖူးဘုရင် ဘရုစလီ ( Bruce Lee) မွေးဖွားခဲ့ရာ တရုတ်ဆေးရုံ (San Francisco Chinese Hospital) ကိုလည်းတွေ့မြင်နိုင်မည်။ ဘရုစလီသည် ထိုဆေးရုံတွင်မွေးဖွားခဲ့ပြီး ဆန်ဖရန်တဖက်ကမ်းရှိ ဥက္ကလံမြို့တွင် ကလေးဘဝက နေထိုင်ခဲ့သည်။ ကိုးနှစ်သားအရွယ်တွင် ဟောင်ကောင်သို့ ပြောင်းရွှေ့သွားကာ အသက်(၁၈)နှစ်အရွယ်တွင် အမေရိကန်ပြည်ထောင်စုသို့ပြန်လည်ရောက်ရှိလာပြီး ဆန်ဖရန်တရုတ်တန်း၌ လအနည်းငယ်နေထိုင်ပြီးနောက် ဆီရားတယ် (Seattle)မြို့သို့ ပြောင်းရွှေ့သွားခဲ့သည်။
(၁၀) ကွိုက်တာဝါ (Coit Tower)
မြို့မြောက်ဖက်ရှိ North Beach ရပ်ကွက်ရှိ တယ်လီဂရပ်တောင်ကုန်း (Telegraph Hill ) ပေါ်တွင်တည်ရှိသည်။ ပေပေါင်း (၂၁၀)အမြင့်ရှိသော ကွန်ဂရိတာဝါတိုင်ကြီးဖြစ်သည်။ မြို့လယ် တစ်မြို့လုံးကို အပေါ်မှ ၃၆၀ ဒီဂရီ အနေအထားဖြင့် တွေ့မြင်နိုင်သည်။ ၁၉၃၂-၃၃ တွင် မီးသတ်မျှော်စင်အဖြစ်အသုံးပြုရန် တည်ဆောက်ခဲ့သည်။ တယ်လီဂရပ်တောင်ကုန်း၏ လှေခါးထစ်များသည်လည်း မြင့်မားလှသဖြင့် ကျန်းမာရေးလိုက်စားသူများ၊ လမ်းလျှောက်သူများအကြိုက်တွေ့ကြသည်။
ထိုနေရာများအပြင် အကွေ့အကောက်များလှသဖြင့် ကမ္ဘာ့အကောက်ကွေ့ဆုံးလမ်းဟု တင်စားကြသည့် Lombard Street ၊ ဂျပန်တောင်း (Japantown)၊ မြို့တော်ခန်းမ (City Hall) ၊ ကုလသမဂ္ဂပလာဇာ (United Nation Plaza)၊ ဆန်ဖရန်ဆိပ်ကမ်းရှိ သမိုင်းဝင် Ferry Building ၊ Nob Hill တောင်ကုန်းပေါ်ရှိ သန်းကြွယ်သူဌေးကြီးများ၏ အိမ်များ၊ Cliff House ခေါ် ပင်လယ်အစွန်းကျောက်တုန်းကြီးပေါ်မှ အိမ်ကြီး၊ ကုန်းမြေ၏အဆုံး (Land End)ရှိ ပစိဖိတ်ကမ်းခြေ (Ocean Beach)၊ Sea Cliff မှ အိမ်ကြီးများ၊ Presidio ခေါ် ရေတပ်စခန်းဟောင်းတည်ရှိရာ တောအုပ်ကြီး စသည်ဖြင့် မြို့တွင်းလည်ပတ်စရာတွေ အများအပြား ကျန်ရှိနေသေးပါသည်။
ဆန်ဖရန်မြို့တွင်းကို အားရအောင်လည်ပတ်ပြီးလျှင် မြို့ပြင်နှင့်အနီးအနားတဝိုက်သို့ သွားလည်ကြပါစို့။ ဆန်ဖရန်စစ္စကို၏ နာမည်ကျော် ဂိုးလ်ဒင်းဂိတ်တံတားကြီးကို ကျော်ဖြတ်ပြီးမြောက်ဖက်သို့ (၁၂)မိုင်ခန့်ရောက်လျှင် နာမည်ကျော်မြူရာဝုဒ် ( Muir Wood)အမည်ရ သဘာဝသစ်တောကြီးရှိသည်။
ထိုသစ်တောကြီးသည် အမေရိကန်ပြည်ထောင်စု၏ အမျိုးသားအထိမ်းအမှတ်အဖြစ် ထားရှိရာသစ်တောကြီးဖြစ်၍ ဧကပေါင်း (၅၅၄)ဧက ကျယ်ဝန်းသည်။ ဝက်သစ်ချပင်များ၊ မဟော်ဂနီပင်များသည် နေပျောက်မထိုးနိုင်အောင် အကိုင်းအခက်များက ယှက်ဖြာနေကြသည်။ တောင်တန်းကြီးပေါ်မှ ဆန်ဖရန်၏ အဝေးမြင်ရှုခင်းနှင့် ပစိဖိတ်သမုဒ္ဒရာကမ်းခြေကြီးကို အလျှားလိုက်မြင်နိုင်သည်။ အနီးအနားရှိ ကမ်းခြေ(Beaches)များသည်လည်း အလွန်သာယာလှပသလို သန့်ရှင်းသည်။ တစ်နှစ်လျှင် ဧည့်သည်တစ်သန်းကျော် လာရောက်လေ့လာကြသည်။
မြို့၏တောင်ဖက်တွင် ဆန်ဘရူနို(San Bruno)တောင်တန်းကြီးက ကန့်လန့်ဖြတ်တည်ရှိသဖြင့် ခြေလျှင်တောင်တက်သမားများအကြိုက်တွေ့ကြသည်။ မြို့မှထွက်၍ အဝေးပြေးလမ်းမ I-280 အတိုင်း(၁၀)မိုင်ခန့်ဆင်းလာလျှင် လမ်း၏ညာဖက်၌ ပစိဖိတ်မြေသားအပိုင်း ( Pacific Plate) နှင့် အမေရိကမြေသားအပိုင်း (America Plate)တို့ဆုံရာ ဆန်အန်ဒရေးရ ( San Andreas) အမည်ရှိ ငလျှင်ကြော (Fault line) ကြီးကို မြင်တွေ့နိုင်သည်။ ထိုငလျှင်ကြောကြောင့် ၁၉၀၆ခု ငလျှင်ကြီးဖြစ်ပေါ်ခဲ့ခြင်းဖြစ်၏။ တောင်မှမြောက်၊ မြောက်မှတောင် တွန်းနေကြသော မြေသားအပိုင်းနှစ်ခုသည် တစ်နှစ်လျှင် တစ်လက်မခန့် ဆန့်ကျင်ဖက်သို့ ရွေ့လျှားနေကြသည်။ နှစ်နှစ်ရာလျှင် တစ်ကြိမ်ခန့် ပျမ်းမျှအားဖြင့် ငလျှင်ဖြစ်ပေါ်လေ့ရှိသည်။
တောင်ဖက်သို့ မိုင်နှစ်ဆယ်ကျော်ဆက်သွားပါက ကမ္ဘာကျော်တက္ကသိုလ်ကြီးတစ်ခုဖြစ်သော စတန်းဖို့ဒ်တက္ကသိုလ်ကိုတွေ့ရမည်။ ထိုမှဆက်၍ တောင်ဖက်သို့အနည်းငယ်ဆက်သွားပါက ကမ္ဘာကျော်ဂူဂဲလ်(Google)ဖေ့ဘွတ် (Facebook) စသည့်ကုမ္ပဏီရုံးချုပ်များကိုတွေ့ရမည်။ ပန်းသီးရုံးချုပ်( Apple Headquarter) ကြီးနှင့် ရာဟူးရုံးချုပ် (Yahoo! Headquarter) တို့ကိုတွေ့ရမည်။ ထိုနေရာတို့ကား ဆီလီကွန်တောင်ကြား (Silicon Valley) ဒေသပင်တည်း။ ကမ္ဘာ့အဆင့်မြင့်နည်းပညာများကို ဖြန့်ချီရာ၊ ထိန်းချုပ်ရာ ထိုဒေသသည် ဆန်ဖရန်ပင်လယ်ကွေ့ (San Francisco Bay Area) ဒေသတွင် ရှိသည်။
ဆန်ဖရန်စစ္စကိုအနီးတစ်ဝိုက်တွင် လည်ပတ်စရာတွေ များလှသဖြင့် ကုန်စင်အောင်မရေးပြနိုင်ပါ။
သည်မျှဆိုလျှင် ဆန်ဖရန်စစ္စကိုနှင့်ပတ်သက်၍ အတန်အသင့်သော ဗဟုသုတများကို ခြုံငုံမိပြီထင်ပါသည်။ သမိုင်းဆရာမဟုတ်သည်မို့ အကျဉ်းချုံးရေးရာတွင် လိုအပ်ချက်များရှိပါက ခွင့်လွှတ်ပါ။
အချုပ်အားဖြင့်ဆိုရသော် ဆန်ဖရန်စစ္စကိုမြို့သည် လူမျိုးပေါင်းစုံ၊ ဘာသာပေါင်းစုံ၊ အတန်းအစားပေါင်းစုံ စုရုံးနေထိုင်သောမြို့တစ်မြို့သာဖြစ်သည်။ သဘာဝဘေးဒါဏ်ကို အကြိမ်ကြိမ်ခံစားခဲ့ရသည်။ မြို့လုံးကျွတ်နီးပါး မီးဘေးသင့်ခဲ့သည်။ အကြိမ်ကြိမ်ပြိုလဲခဲ့သော်လည်း မြို့သူမြို့သားများသည် မတူညီသောအရာများမှ ခွန်အားတစ်ရပ်ဖေါ်ဆောင်ကာ ပြန်လည်တည်ဆောက်ခဲ့ကြသည်။ အမုန်းတရားများကို ချစ်ခြင်းအားအဖြစ် ပြောင်းလည်းနိုင်ခဲ့သည်။ ခရစ်ယာန်၊ ဗုဒ္ဓ၊ ဟိန္နူ၊ အစ္စလ္လမ်၊ လူဖြူ၊ လူမဲ၊ လူဝါ၊ ကျား၊ မ၊ လိင်တူချစ်သူ ဟူသည့် အမည်နာမများမှ ဖေါက်ထွက်ကာ အရည်အချင်းရှိသူကို အရည်အချင်းရှိသလို နေရာပေးနိုင်သော အခြေအနေတစ်ရပ်ကို ဖန်တည်းနိုင်ခဲ့သည်။
ထို့ကြောင့်လည်း မတူညီမှုများညီညွတ်ခဲ့သည့်ဆန်ဖရန်စစ္စကိုမှ လူဖြူခေါင်းဆောင်များအပြင် အာရှနွယ်ဖွားမြို့တော်ဝန်၊ လူမဲအမျိုးသမီးမြို့တော်ဝန်၊ အမျိုးသမီးရဲချုပ်၊ အမျိုးသမီးမီးသတ်ဦးစီးချုပ်၊ လိင်တူချစ်သူ ရပ်ကွက်အုပ်ချုပ်ရေးမှူး စသည်တို့ ထွက်ပေါ်ခဲ့သလို ကမ္ဘာပေါ်ရှိ အနယ်နယ်အရပ်ရပ်မှ အခြေချရန်ရောက်ရှိလာကြသည့် သူမှန်သမျှကို နွေးထွေးစွာဖြင့် ကြိုဆို နေဆဲဖြစ်သည်။မည်သူဖြစ်စေ ဥပဒေအောက်တွင် လူတိုင်းကို ညီမျှစွာအခွင့်အရေးရစေသည်။ ထို့ကြောင့်လည်း ဆန်ဖရန်စစ္စကိုမြို့သို့ လာလည်ကြသူဧည့်သည်အပေါင်းမှာ ဝင်လာမစဲတသဲသဲ။ မြို့၏နာမည်သည်လည်း ကမ္ဘာ့အလည်တွင် ထွန်းတောက်နေဆဲ။
ကျွန်တော်တို့ မြန်မာပြည်တွင်လည်း လူမျိုးပေါင်းစုံ ဘာသာပေါင်းစုံ မှီတင်းနေကြသည်။ ခုချိန်ထိတော့ တိုက်ကြခိုက်ကြ ဆဲကြဆိုကြသည့် အမုန်းကမ္ဘာထဲမှ မထွက်နိုင်ကြသေး။ မယုံကြည်မှုများစွာမှ ဖေါက်မထွက်နိုင်ကြသေး။ မတူညီမှုတွေကို အားတစ်ခုဖြစ်လာရန် ညီညွတ်စွာ မတည်ဆောက်နိုင်ကြသေး။ တစ်နေ့နေ့မှာတော့ ထိုညီညွတ်မှုကို မြင်ရနိုင်ကောင်းပါသည်။ ထိုနေ့ကို မျှော်လင့်ရင်းဖြင့် ဆန်ဖရန်စစ္စကိုဆောင်းပါးရှည်ကြီးကို အဆုံးသတ်လိုက်ပါရစေ။
ချစ်သော မိတ်ဆွေသူငယ်ချင်းအပေါင်း ကျန်းမာချမ်းသာကြပါစေ။
ကျွန်တော်မောင်လူပေပါ။
ချစ်တဲ့
မောင်လူပေ
အဓိပတိကမ္မ
No comments:
Post a Comment